1.2 | LenzuoliSOSpesi
de Silvia Capiluppi
Descrizione
L’artista a realizat quatre novèls LenzuoliSOSpesi, uns òbra dubèrta que despuei lo 2018 a jà arrambat de mila personas. Sal n.122 lhi visitators d’la mòstra “TUTTI I NOMI DI D’IO” al Filatoio d’Caralh an ricamat lor nòm, e las ricamatritz de “Di Filo in Filo” una crotz occitana. Sal n.123 lhi pensionants d’la Residença Casa Vittoria d’Sen Pier an ricamat lo nòm “Vittoria”. Lo n.124, en Val Maira, es estat pintat d’blòi abo graficas qu’arsònon las copèlas, anticas incisions s’la ròcha des valadas Grana e Maira. Ensemp lo ricam di nòms d’la comunitat e d’l’estela occitana a set ponchas. Lo n.127, dal titol “1.2”, es estat ricavat da una antica bobina d’seda adobraa per realizar lhi ribans des maquinas per escriure. L’artista a ricamat abo fil d’seda blanc un coquet, abo fil d’òr un parpalhon, abo fil ros 1.2 km – la longuessa minima tiraa ent’un fil solet da un unic bigat.
Lhi linçòls son visibles en cò d’l’Ecomusèu Terra del Castelmagno.
Silvia Capiluppi
Silvia Capiluppi es artista, arquitèct, naturòpata e magistra d’yoga. Despuei d’ans cura un grand projèct in progress, inclusiu e comunitari, per la realizacion de linçòls ricamats abo fil ros que repòrten noms, pensiers, simbols. Diaris comuns d’passat e present, ente lhi fils des istòrias s’entreçon ent’una granda istòria colectiva e en escrichura dubèrta. Las personas dapè e da luenh son envitaas a ricamar abo fil ros lor nòm e un simbol grafic sus linçòls blancs. Da aquì son buelhats tanti autri projècts de laboratòris. Lo ricam coma pratica d’condivision e meditacion, ‘na sòrta d’preguièra corala que s’enraïtza en activitats anticas e comunas a diferentas culturas ental mond. Lo mesme fil ros se retròba sovent e en ambients diferents per d’emplegs pratics e rituals.
